Չնայած պետական լինելուն, 35 տարում պետությունը որևէ բարելավում չի արել «Գոյի» համար. Սարգիս Արզումանյան

«Գոյ» թատրոնի դերասանները երկար բանավիճելուց հետո համաձայնության եկան, և նրանք «Գոյի» տարածք մտան Սունդուկյանի անվան թատրոնի մուտքով։

Դերասանները չէին կարողանում մտնել թատրոն, քանի որ Սունդուկյանի անվան թատրոնը նրանցից պահանջում է թերթիկներ լրացնել, որտեղ կնշվեն անձնական տվյալները (անուն, ազգանուն, պաշտոն, հաշվառման հասցե), որպեսզի հատուկ քարտեր տրամադրվեն մուտք գործելու համար։

«Գոյ» թատրոնի կառավարման խորհրդի նախագահ Սարգիս Արզումանյանի խոսքով` մտան իրենց թատրոն, որպեսզի հասկանան` շուրջ 1 շաբաթում, ինչ դռները փակ են, փոփոխություններ կան, թե ոչ։

«Հիմա կշրջենք մեր դահլիճում, որպեսզի դուք էլ արձանագրեք, թե ինչպիսին է մեր թատրոնը ներկա պահին։ Մենք շուրջ 1 շաբաթ է, ինչ չէինք կարողանում մուտք գործել այստեղ։ «Գոյ» թատրոնն այսօր օկուպացված է, մենք օկուպացված տարածքում ենք գտնվում։ Առավել քան վստահ եմ` սա տարածքի կռիվ է։ Սունդուկյան թատրոնն ասում է` իրենն է, «Գոյ» թատրոնն ասում է` իրենն է, պետությունն էլ իրենն է համարում, վերջն ո՞ւմն է։ Այս հարթակը հանդիսատեսինն է»,– լրագրողներին ասաց Արզումանյանը։

Նրա խոսքով՝ չնայած պետական լինելուն, 35 տարում պետությունը որևէ բարելավում չի արել «Գոյի» համար։ Արզումանյանը նշեց` այն, ինչ կա, ստեղծվել է դերասանների ձեռքերով։

«Գոյ» թատրոնի բեմական մասի պատասխանատու, դերասան Էդգար Անդերասյանն ասաց, որ թատրոնի գրեթե ողջ գույքն անձնական միջոցներով են ձեռք բերել, պետական միջոցներով 20-25 անուն ապրանք կա, որից 12-ը` աթոռ, օդափոխության համակարգը և աստիճաններ։

Հիշեցնենք` «Գոյը» Սունդուկյանի անվան թատրոնին միացնելու որոշման նախագիծը ներկայացրել էր ԿԳՄՍ նախարարությունը` որպես հիմք նշելով, որ «Գոյ» կենտրոնը 2022թ․ 3 մլն 436 հազար 990 դրամով թերի է կատարել տարեկան ֆինանսական պլանը: Բացի այդ, հրավիրված բեմադրիչների կողմից ներկայացումներ չեն բեմադրվել, կենտրոնը չի համագործակցել ԿԳՄՍ նախարարության հետ և այլն:

Լրահոս

Օրացույց

Ապրիլի 2024
Ե Ե Չ Հ Ու Շ Կ
1234567
891011121314
15161718192021
22232425262728
2930