Վրաստանի գյուղատնտեսության նախարարությունը հերքել է «Հրապարակ» թերթի այն լուրերը, թե հայկական գյուղմթերքը, մասնավորապես՝ ելակը, թուրքականի անվան տակ Վրաստանի տարածքով է մատակարարվում Ռուսաստան։
«Նախարարությունը կատեգորիկ կերպով հերքում է հայկական պարբերականի տարածած տեղեկատվությունը՝ հայկական արտադրանքի ծագման փոփոխության և վերաարտահանման նպատակով մեկ այլ հարևան երկրի անվան տակ ՌԴ տարածք բեռների ներկրման մասին։ Նման հաղորդումները սպեկուլյատիվ բնույթ են կրում, չեն համապատասխանում իրականությանը և կարող են վնաս հասցնել երկու երկրների միջև տնտեսական հարաբերություններին», — ասված է հայտարարության մեջ։
Գերատեսչությունը նաև մտահոգություն է հայտնել, որ Վրաստանը ներքաշվում է հարևան երկրում ընթացող քաղաքական պայքարի նման կոպիտ ձևերի մեջ։
