Կառավարությունն իր այսօրվա՝ դեկտեմբերի 11–ի նիստում հավանություն տվեց Հայաստանի և Վերակառուցման և զարգացման միջազգային բանկի միջև «Հայաստանի ջրի և ոռոգման ծառայությունների բարելավման ծրագիր. 1-ին փուլ» վարկային համաձայնագրի վավերացմանը։
Այս համաձայնագիրը ստորագրվել է 2025 թվականի սեպտեմբերին, որով Բանկը Հայաստանի Հանրապետությանը տրամադրում է 70.4 միլիոն եվրո՝ իսկ ՀՀ կառավարությունը պարտավորվում է համաֆինանսավորել հարկերը, տուրքերը, Ծրագրի իրականացման հետ կապված գործառնական ծախսերը և մնացած այն ծախսերը, որոնք վարկային միջոցներից թույլատրելի չէ իրականացնել։
Ծրագրի տևողությունը ուժի մեջ մտնելուց հետո 5 տարի է։ Համաֆինանսավորման համաձայնագրի ուժի մեջ մտնելու վերջնաժամկետը՝ 2026թ. մարտի 31–ը։
Նախատեսվում է նաև Ծրագրի համաֆինանսավորում Զարգացման ֆրանսիական գործակալության (Agence Française de Développement) կողմից:
Ծրագրի ուղղակի և անուղղակի շահառուներն են՝
գյուղատնտեսությամբ զբաղվող ֆերմերները և ջրօգտագործողների ընկերությունները (ՋՕԸ-ներ),
գյուղական համայնքների բնակիչները, որոնք կստանան բարելավված ջրամատակարարում և ջրահեռացում,
Ջրային կոմիտեն և «Ջրառ» ՓԲԸ-ն, որոնք կզարգացնեն կառավարման և պլանավորման կարողությունները,
տեղական ինքնակառավարման մարմինները և մարզային կառույցները,
քաղաքացիական հասարակության և մասնավոր հատվածի ներկայացուցիչները։
Բազմափուլ ծրագրային մոտեցման (MPA) կիրառման հիմնավորումը
MPA-ը ներկայացնում է 10-ամյա ժամանակահատվածում իրականացվող ծրագիր՝ բաղկացած երկու փուլից, որը նպատակ ունի.
ուժեղացնել ինստիտուցիոնալ կարողությունները, հատկապես՝ ջրառ և ջրօգտագործող ընկերությունների և տեղական կառույցների կարողությունների զարգացման միջոցով,
ապահովել ծառայությունների ֆինանսական կայունություն՝ սակագնային բարեփոխումների, ծախսերի փոխհատուցման և մասնավոր հատվածի ներգրավման խթանման միջոցով,
օգտագործել տեղային և մասշտաբայնացման մեխանիզմներ՝ նախքան լայնածավալ ներդրումների իրականացումը (piloting and scaling),
ստեղծել բարենպաստ միջավայր մասնավոր ներդրումների համար։
