Այսօր՝ դեկտեմբերի 5-ին, արտակարգ դեպք է տեղի ունեցել Երևանում: Ժամը 05:30-ի սահմաններում Էրեբունի վարչական շրջանի Վարդաշեն թաղամասի բնակիչ Էդիկ Գալստյանը տարօրինակ ձայներ է լսում, ապա տնից դուրս է գալիս այգի, որտեղ նկատում է, որ 3 թափառական շներ վնասել են իր կողմից պահվող նապաստակների վանդակները, հաղորդում է Shamshyan.com–ը։
Շները, տեսնելով նրան, փախչում են, իսկ րոպեներ անց Է. Գալստյանը հայտնաբերում է, որ իր կողմից պահվող 20 նապաստակներից 18-ը սատկած են:
Այսօր՝ դեկտեմբերի 5-ին, կայքի հետ զրույցում նա ասում էր. «Մի քանի կոպեկ էի հետ գցել ու կնոջս հետ որոշել էինք նապաստակներ պահել, շների կողմից սատկացրած նապաստակների մեծ մասը պետք է առաջիկա օրերին ծնեին, էն էլ՝ ո՞նց են կարողացել երկաթե վանդակների ճաղերը կոտրել ու 18-ին էլ խեղդել: Հիմա խնդրանքով դիմում եմ բարեգութ մարդկանց, ովքեր կարող են՝ թող օգնության ձեռք մեկնեն մեզ»:
Ընտանիքը վարձակալական հիմունքներով է բնակվում այդ տանը, խնամքին ունի 3 անչափահաս երեխա և իրենց հանապազօրյա հացը վաստակում են նապաստակներ պահելով:
Հարևաններն էլ նշում են, որ ընտանիքը համերաշխ է ու դրական է բնութագրվում:
