Խորվաթիայում հազարավոր մարդիկ կիրակի օրը միացել են բողոքի երթերին՝ մի շարք միջադեպերից հետո, որոնք հանգեցրել են էթնիկ և քաղաքական լարվածության աճին Եվրամիության անդամ այս երկրում, հայտնում է Associated Press-ը։
Չորս խոշոր քաղաքներում, ներառյալ մայրաքաղաք Զագրեբը, կազմակերպվել են հանրահավաքներ «Միավորվենք ֆաշիզմի դեմ» կարգախոսով։ Բազմությունը վանկարկում էր «Մենք բոլորս հակաֆաշիստներ ենք»՝ խոստանալով դիմակայել աջ խմբավորումների՝ վախ սերմանելու և ընդդիմախոսներին լռեցնելու փորձերին։
Ցուցարարները նաև պահանջում էին, որ իշխանությունները դադարեցնեն ծայրահեղ աջ խմբավորումների գործունեությունը և նրանց կողմից ֆաշիստական խորհրդանիշների հաճախակի օգտագործումը։
Նոյեմբերյան ծայրահեղական գործողությունները ուղղված էին մայրաքաղաք Զագրեբում և ծովափնյա Սպլիտում էթնիկ սերբերի մշակութային միջոցառումների դեմ, ինչը սերբ-խորվաթական 1991–1995 թթ. պատերազմից տասնամյակներ անց մտահոգություն է առաջացրել էթնիկ բռնության հնարավորության վերաբերյալ։
Սևազգեստ երիտասարդները ֆաշիստական և ազգայնական կարգախոսներ էին վանկարկում ցուցասրահների մոտ, մինչև ոստիկանությունը միջամտեց և կանգնեցրեց նրանց։
