Չորեքշաբթի օրը Դամասկոսի վրա Իսրայելի հասցրած հարվածի հետևանքով վնասվել են Al Arabiya հեռուստաընկերության Սիրիայում գտնվող գրասենյակները, հայտնում են լրատվամիջոցները։
Սիրիայում լարվածությունն աճել է, երբ Իսրայելը վերսկսել է իր հարվածները Էս-Սուվեյդայի ուղղությամբ, հետո նրանք հարձակվել են Դամասկոսում Սիրիայի բանակի շտաբի վրա՝ դրուզներով բնակեցված քաղաքում տեղի ունեցած ջարդերից հետո։
Իսրայելական զինուժը հայտարարել է, որ հարվածել է Դամասկոսում Սիրիայի պաշտպանության նախարարության մուտքին և ուժեղացրել է սիրիական իշխանությունների վրա հարձակումները։ Այդ ամենն արվել է դրուզ փոքրամասնությանը կառավարական ուժերի հարձակումներից պաշտպանելու նպատակով։
Սիրիայի պաշտպանության նախարարության կողմից երեքշաբթի երեկոյան հայտարարված հրադադարը կարճ է տևել։ Երեքշաբթի օրը Իսրայելը հարվածներ է հասցրել Էս-Սուվեյդայի շրջանում Սիրիայի կառավարական զորքերին, որտեղ բնակչության մեծ մասը դրուզներ են և հայտարարել է, որ դա արվում է կրոնական փոքրամասնությանը պաշտպանելու համար։ Ավելի քան 100 մարդու մահից հետո Դամասկոսը զորքեր է մտցրել Էս-Սուվեյդա։
