Հնդկաստանը 1960 թվականին Ինդուս գետի ջրերի մասին Պակիստանի հետ պատմական պայմանագրի ստորագրումից ի վեր առաջին անգամ դադարեցրել Է Պակիստանի ուղղությամբ Ինդուս գետից ջրի մատակարարումը՝ փակելով բոլոր 4 շլյուզները (նավարկելի, հիդրոտեխնիկական կառույց): Այս մասին հայտնում է ANI News գործակալությունը, փոխանցում է Lenta.ru-ն:
Պակիստանի իշխանությունները հայտարարել են, որ Ինդուսի ջրերի արգելափակումը դիտարկում են որպես «պատերազմի ակտ» և մտադիր են պատասխանել բոլոր հնարավոր միջոցներով:
Ավելի վաղ Ջամու և Քաշմիր նահանգի Պահալգամ շրջանում տեղի է ունեցել ահաբեկչություն։ Նյու Դելին Իսլամաբադին մեղադրում է ահաբեկչական գործունեությանը աջակցելու մեջ, ինչը Պակիստանը կտրականապես մերժում է:
Հիշեցնենք՝ Պակիստանի ՊՆ-ն հայտարարել էր, որ երկիրը պատրաստ է Հնդկաստանի հետ զինված դիմակայության: Ավելի վաղ էլ հաղորդվել էր, որ Հնդկաստանը 48 ժամվա ընթացքում կարտաքսի Պակիստանի բոլոր քաղաքացիներին, որոնք երկրում են գտնվում SAARC վիզային համակարգով:
