Շարունակվող մարտական գործողությունների ֆոնին Իսրայելն առաջարկել է հրադադար հաստատել՝ Գազայում պահվող պատանդներից կեսին վերադարձնելու դիմաց, հայտնում է Reuters-ը՝ վկայակոչելով իսրայելցի անանուն պաշտոնյաների։
Միաժամանակ իսրայելական բանակը Գազայի բնակչության տարհանման նոր հրաման է տվել՝ հայտարարելով Գազայի հարավային հատվածում նախատեսվող «ինտենսիվ գործողությունների» մասին։
Գործակալության աղբյուրները նշել են, որ իսրայելական կողմն առաջարկել է նախատեսվող 40-50-օրյա հրադադարի ընթացքում ազատ արձակել կենդանի մնացած 24 պատանդներից կեսին, ինչպես նաև փոխանցել մոտ 35 ենթադրյալ մահացածներից գոնե կեսի մարմինները։
Իսրայելի վարչապետ Բենիամին Նեթանյահուն ավելի վաղ հայտարարել էր, որ Իսրայելը կուժեղացնի ճնշումը ԱՄՆ-ի և ԵՄ-ի կողմից ահաբեկչական կազմակերպություն ճանաչված «Համաս»-ի վրա, բայց կշարունակի բանակցությունները պատանդներին ազատելու ուղղությամբ։
Նեթանյահուն նշել էր, որ «Համաս»-ի առաջնորդներին կթույլատրվի լքել Գազայի հատվածն ավելի լայն կարգավորման, այդ թվում՝ պաղեստինցիների «կամավոր արտագաղթի» վերաբերյալ ԱՄՆ նախագահ Դոնալդ Թրամփի առաջարկների շրջանակներում: Նեթանյահուն նաև կրկնել էր «Համաս»-ի զինաթափման Իսրայելի պահանջը։ Խմբավորումը մերժել է պահանջը՝ այն համարելով «կարմիր գիծ», որը չի հատելու։
Ծայրահեղական «Համաս»-ը հայտարարել է, որ ընդունել է հրադադարի պահպանման դիմաց ամեն շաբաթ հինգ պատանդներ ազատելու Քաթարի և Եգիպտոսի միջնորդների առաջարկը։
Մարտի լույս 18-ի գիշերը, հրադադարի հաստատումից երկու ամիս անց, իսրայելական բանակը վերսկսել է օդային հարվածները Գազայի թիրախներին։ Ընդգծելով, որ հրադադարի երկարաձգման բանակցություններում առաջընթաց չկա՝ Նեթանյահուն ասել է, որ ինքն է հրամայել վերսկսել այդ հարվածները։ Մարտի սկզբին ԱՄՆ նախագահ Դոնալդ Թրամփը սպառնացել էր ոչնչացնել «Համաս» խմբավորմանը, եթե վերջինս անհապաղ չվերադարձնի իսրայելցի պատանդներին և չհանձնի մահացածների մարմինները։
