Ոչինչ չի խանգարում խաղաղության պայմանագրի ստորագրմանը, բացի Ադրբեջանի կամքի բացակայությունից։ Այս մասին հոկտեմբերի 25-ին Ազգային ժողովում ավանդական ճեպազրույցների ժամանակ հայտարարեց իշխող «Քաղաքացիական պայմանագիր» խմբակցության պատգամավոր Հռիփսիմե Գրիգորյանը։
Հայաստանի դիրքորոշումը, ըստ նրա, չի փոխվել. Հայաստանը հայտարարել է նախապես համաձայնեցված կետերի շրջանակներում համաձայնագիր ստորագրելու պատրաստակամության մասին։
«Հայաստանը պատրաստ է ստորագրել խաղաղության պայմանագիրը համաձայնեցված հոդվածներով, որոնք, մեր գնահատմամբ, համոզմամբ, ամբողջությամբ պատասխանում են այն հարցերին, թե որոնք պետք է լինեն հիմնարար սկզբունքները, որով պետք է կարգավորվեն հարաբերությունները, նաև վստահություն մթնոլորտ ձևավորելու և գործընթացում առաջ շարժվելու հնարավորություն է տալիս»,- ասաց ՔՊ-ական պատգամավորը։
