ՖԻՖԱ-ի հատուկ հանձնաժողովը բավարար հիմքեր չի գտել՝ պատժամիջոցներ կիրառելու և Իսրայելի հավաքականին միջազգային մրցաշարերից հեռացնելու համար: Այս մասին հայտնում է One պորտալը:
Նախկինում Պաղեստինի ֆուտբոլի ֆեդերացիան ևս 11 ազգային ֆեդերացիաների աջակցությամբ, պաշտոնապես պահանջել էր հեռացնել Իսրայելի ֆուտբոլի ֆեդերացիային ՖԻՖԱ-ի շրջանակներում ցանկացած գործունեությունից՝ «ՖԻՖԱ-ի կանոնադրության կոպիտ և մշտական խախտման, ինչպես նաև պաղեստինյան ակումբների և ֆուտբոլիստների իրավունքների կանոնավոր և աննախադեպ ոտնահարման» համար:
Օգոստոսի վերջում ՖԻՖԱ-ն ստացել էր անկախ իրավական փորձագետների հաշվետվություն, որի բովանդակությունը չէր հրապարակվել: Հաղորդվում է, որ ՖԻՖԱ-ի հատուկ հանձնաժողովը, քննարկելով հաշվետվության բովանդակությունը, որոշել է մերժել Իսրայելի ֆեդերացիայի, հավաքականների և ակումբների հեռացման պահանջը: Աղբյուրը նշում է, որ ՖԻՖԱ-ի պաշտոնական որոշումը դեռևս չի հրապարակվել:
