Այսօր՝ հուլիսի 14-ին, «Օլիմպիաստադիոն» մարզադաշտում (Բեռլին) կկայանա 2024 թվականի Եվրոպայի առաջնության եզրափակիչ հանդիպումը Իսպանիայի և Անգլիայի ազգային հավաքականների միջև։
Խաղը կմեկնարկի ժամը 23:00-ին և կցուցադրվի Արմենիա TV-ի և Armenia Premium-ի եթերում: Հանդիպումը կսպասարկի մրցավարական թիմը՝ ֆրանսիացի Ֆրանսուա Լետեքսիեի գլխավորությամբ։
Անգլիան եզրափակչի ճանապարհին փլեյ-օֆֆում հաղթել է Հոլանդիայի, Շվեյցարիայի և Սլովակիայի հավաքականներին։ Իսպանիան, իր հերթին, ուժեղ է գտնվել Ֆրանսիայից, Գերմանիայից և Վրաստանից։
Հիշեցնենք, որ Եվրոպայի առաջնության գործող հաղթողը Իտալիայի հավաքականն է, որը Լոնդոնի «Ուեմբլի» մարզադաշտում Եվրո-2020-ի եզրափակչում հետխաղյա 11-մետրանոց հարվածաշարով հաղթել է Անգլիային:
