Կիրանցում իրավիճակը շարունակում է լարված մնալ, այս պահին գյուղում հազարից ավելի ոստիկան ու սևբերետավոր կա։
Կանայք շարունակում են փակ պահել ճանապարհը, սակայն գյուղապետը կասկածներ ունի, որ ոստիկանները բռնի ուժով այդ ճանապարհն էլ կբացեն:
Բազմաթիվ քաղաքացիներ հավաքվել են Ոստիկանության Իջևանի բաժանմունքի մոտ, ուր ավելի վաղ տեղափոխվել են Կիրանցում բերման ենթարկվածները։ Նրանց թվում է նաև Բագրատ Սրբազանը։
Հիշեցնենք, որ ավելի վաղ պատգամավոր Գառնիկ Դանիելյանը հայտնել է, որ վաղ առավոտյան բիրտ ուժ կիրառելով Իջևանի ոստիկանության բաժին բերման են ենթարկել ճանապարհը փակած կիրանցեցի տղամարդկանց: Ավելի ուշ հայտնի է դարձել, որ բերման է ենթարկվել 31 քաղաքացի։
Պատգամավորը հայտնել է նաև, որ Կիրանցում ոստիկանության կողմից իրականցվում է «Օղակ» օպերացիա:
«Ոստիկանության ուժերը փակել են գյուղի մուտքերը: Մեծաքանակ ոստիկանականներ լցվել են գյուղ: Ականազերծման աշխատանքներին խոչընդոտող գյուղացի տղամարդիկ վայրենի կերպով բերման են ենթարկվել: Բերման ենթարկվածների մեջ կան նաև անչափահասներ: Այս պահին գտնվում եմ Իջևանի ոստիկանության բաժնում, որտեղ բերման է ենթարկվել 2 տասնյակից ավել քաղաքացի», — գրել է նա:
