ԱՄՆ ողջ տարածքում ավելի քան 8000 ավիաչվերթ, որոնք պետք է իրականացվեին հանգստյան օրերին, չեղարկվել են հզոր բքերի պատճառով, հայտնում է Associated Press-ը: Ակնկալվում է, որ դրանք վնաս կհասցնեն երկրի մեծ մասին՝ սպառնալով մի քանի օրով հոսանքազրկել բնակավայրերն ու փակել հիմնական ճանապարհները:
Նյու Մեքսիկոյից մինչև Նոր Անգլիա ընկած տարածքում մոտ 140 միլիոն մարդ փոթորկի մասին նախազգուշացում է ստացել։ Ազգային օդերևութաբանական ծառայությունը նախազգուշացնում է համատարած առատ ձյան և աղետալի մերկասառույցի շերտի մասին, որը ձգվում է արևելյան Տեխասից մինչև Հյուսիսային Կարոլինա։ Օդերևութաբաններն ասում են, որ վնասը, հատկապես սառցապատ շրջաններում, կարող է համեմատելի լինել փոթորկի պատճառած վնասի հետ։ Ուրբաթ երեկոյան փոթորկի ճակատը Տեխասի որոշ շրջաններում բերել է սառցե անձրև և թաց ձյուն, իսկ Օկլահոմայում տեղացել է ձյուն ու թաց ձյուն։ Ըստ օդերևութաբանական ծառայության կանխատեսումների, հարավային շրջաններով անցնելուց հետո փոթորիկը կտեղափոխվի հյուսիս-արևելք՝ Վաշինգտոնից մինչև Նյու Յորք և Բոստոն բերելով մոտ 30 սանտիմետր ձյուն։
Ավելի քան մեկ տասնյակ նահանգների նահանգապետեր ահազանգել են սպասվող վատ եղանակի վերաբերյալ՝ հայտարարելով արտակարգ դրություն կամ հորդորելով մարդկանց մնալ տանը։
