ԱՄՆ Կոնգրեսում Դոնալդ Թրամփի Գրենլանդիայի քաղաքականության նկատմամբ դժգոհությունը մեծանում է՝ ոչ միայն դեմոկրատների, այլև Հանրապետական կուսակցության շրջանում։ Դրա պատճառը նախագահի հռետորաբանությունն է՝ կղզին ԱՄՆ-ին ազգային անվտանգության նկատառումներից ելնելով «միացնելու» հնարավորության մասին, հաղորդում է Bild-ը։ Որոշ հանրապետականներ այս մոտեցումը համարում են վտանգավոր և նվաստացուցիչ իրենց դաշնակիցների համար։
Հանրապետական կոնգրեսական Դոն Բեյքոնը Թրամփի հայտարարությունների մասին ասել է. «Դա ամենահիմար բանն է, որ ես երբևէ լսել եմ» և զգուշացրել է, որ դաշնակիցների վրա շարունակական ճնշումը կարող է հանգեցնել իմպիչմենտի գործընթացի։
Մյուս օրենսդիրները նշում են, որ Արկտիկայում ԱՄՆ ռազմական ներկայության ամրապնդումը կարող է հանգիստ քննարկվել գործընկերների հետ՝ առանց սպառնալիքների դիմելու։
Կոնգրեսն արդեն քննարկում է հնարավոր ռազմական լուծումը խոչընդոտելու օրենսդրական քայլերը։ Սենատոր Թոմ Թիլիսը հայտարարել է, որ կարող է ձևավորվել երկկուսակցական մեծամասնություն՝ պատերազմական լիազորությունների մասին բանաձև ընդունելու համար, որը կարգելի Գրենլանդիայի դեմ ցանկացած ռազմական գործողություն։
Նրա գործընկեր Լիզա Մուրկովսկին նշել է, որ Կոնգրեսն արդեն փորձում է հանգստացնել ՆԱՏՕ-ին և ԵՄ դաշնակիցներին, քանի որ Գրենլանդիայի շուրջ լարվածությունը սկսել է ազդել տրանսատլանտյան հարաբերությունների վրա։
