Ազգային միասնության օրը Ռուսաստանի նախագահ Վլադիմիր Պուտինը Հայ առաքելական եկեղեցու Ռուսաստանի և Նոր Նախիջևանի թեմի առաջնորդ արքեպիսկոպոս Եզրասին (աշխարհիկ անունը՝ Մկրտիչ Ներսիսյան) է հանձնել Ալեքսանդր Նևսկու շքանշանը, հաղորդում է РИА Новости-ն։
Պարգևներ են ստացել նաև այլ կրոնական դավանանքների ներկայացուցիչներ։
Ռուսաստանի Դաշնության մահմեդականների հոգևոր վարչության ղեկավար, մուֆթի Ռավիլ Գայունութդինը պարգևատրվել է «Անձնուրաց աշխատանքի համար» շքանշանով։ Պատվո շքանշանով են պարգևատրվել Ռուսաստանի գլխավոր ռաբբի Բեռլ Լազարը, ռուս բողոքականների ղեկավար Սերգեյ Ռյախովսկին և Ռուս ուղղափառ հին հավատացյալների եկեղեցու ղեկավար, միտրոպոլիտ Կոռնիլին։ Պուտինը նախագահական պատվոգրեր է հանձնել Ռուսաստանի բուդդայական ավանդական սանգհայի ղեկավար Խամբո լամա Դամբա Այուշեևին և գերագույն մուֆթի Թալգատ Թաջուդդինին։
Հիշեցնենք, որ արքեպիսկոպոսն այս բարձր պարգևին է արժանացել այս տարվա մարտին։
