Հազարավոր տեղահանված պաղեստինցիներ Գազայի հատվածի հարավային շրջաններից սկսել են վերադառնալ հյուսիս՝ Գազա քաղաք։
Տեղի ոստիկանությունը հայտնել է, որ իրավապահները կտեղակայվեն այն հատվածներում, որտեղից իսրայելական բանակը դուրս է եկել։ Գազայում պաղեստինյան ոստիկանության ուժերը հայտարարություն են տարածել՝ քաղաքացիներին կոչ անելով իրենց տներ վերադառնալիս ծայրահեղ զգույշ և ուշադիր լինել կասկածելի առարկաներ կամ չպայթած ռումբեր նկատելու դեպքում։
Գազայի կառավարության լրատվական գրասենյակն էլ բնակիչներին կոչ է արել համագործակցել և կարգապահ լինել, երբ մարդասիրական օգնությունը սկսի մուտք գործել անկլավ։
Միաժամանակ Իսրայելի բանակի խոսնակը Գազայի բնակիչներին ուղղված ուղերձում հայտնել է, որ իսրայելական ուժերը շարունակելու են տեղակայված մնալ Գազայի հատվածի որոշակի տարածքներում, և քաղաքացիներին զգուշացրել է չմոտենալ ռազմական կետերին։
