Ռուսական բանակը շարունակում է ուկրաինական տարածքների գրավումը երկրի արևելքում։ Ընդ որում, Ուկրաինայի զինված ուժերը ստիպված են դիմակայել ոչ միայն զենքի, այլև անձնակազմի սակավությանը։ Ինչպես հայտնում է Guardian-ը, հրամանատարությունն արդեն ռազմաօդային պաշտպանության ստորաբաժանումներից զինվորներ է ուղարկում ռազմաճակատ՝ որպես հետեւակայիններ։ Ուկրաինական բանակը հայտնվել է ծանր իրավիճակում։
Պատերազմից հոգնածությունը դասալքությունը դարձրեց սովորական: AP լրատվական գործակալության փոխանցմամբ՝ պատերազմի սկզբից շուրջ 100 հազար զինվորականներ մեղադրվել են դասալքության մեջ։
Ուկրաինայի զինված ուժերի կորուստների թվի գնահատման համաձայն, որը Wall Street Journal-ը ստացել է հենց Ուկրաինայի աղբյուրից, պատերազմի սկզբից ի վեր զոհվել է մոտ 80 հազար ուկրաինացի զինվորական, և մոտ 400 հազարը վնասվածքների պատճառով լքել են շարքերը։
Կորուստները փոխարինելու համար բավարար պատրաստված զինվորներ չկան։ 114-րդ տարածքային պաշտպանության ուժերի բրիգադի մի ուկրաինացի սպա Guardian-ին ասել է, որ նորակոչիկները պիտանի չեն եղել ծառայության համար և վատ մարտական պատրաստվածություն ունեն։
90 նորակոչիկներից «միայն 24-ն էին պատրաստ զբաղեցնել իրենց դիրքերը, մնացածը ծեր էին, հիվանդ կամ հարբեցող»։
Դա Ուկրաինայի նախագահ Վլադիմիր Զելենսկիին կանգնեցնում է բարդ որոշման առաջ։ Որոշ տեղեկությունների համաձայն՝ Վաշինգտոնը նրան խնդրել է մոբիլիզացիոն տարիքը 25-ից իջեցնել 18-ի։ Դա շատ ցավալի կլիներ Ուկրաինայի համար։ 18-25 տարեկանների սերունդն արդեն փոքր է, քանի որ ԽՍՀՄ-ի փլուզումից հետո ծնելիությունը կտրուկ անկում ապրեց։
Զելենսկին ավելի վաղ ասել էր, որ չի ցանկանում իջեցնել մոբիլիզացիոն տարիքը։ Բայց նա ունի՞ ընտրություն։ Նրան արդեն ստիպել են իջեցնել նշաձողը 27-ից մինչև 25 տարեկան, հիշում է BILD-ի քաղաքական մեկնաբան Ջուդիթ Գորսը։
Մյուս կողմից, խնդիրը միայն մոբիլիզացիոն տարիքում չէ. Արևմուտքի անվճռականության պատճառով Ուկրաինան ստիպված էր տեխնիկայի պակասը փոխհատուցել մարդկային զոհերով։ Եվ ահա հետևանքները։
«18 տարեկանները դեռ երեխաներ են։ Միգուցե նրանք կարող էին նվազագույն տարիքը հասցնել 23-ի, բայց նույնիսկ հիմա Կիևում բավականաչափ մարդիկ կան, ովքեր կարող են պայքարել: Բայց նրանք պարզապես չեն ցանկանում դա անել», — Guardian-ին ասել է 114-րդ բրիգադի զինվորը:
