ԵԱՏՄ-ն ի սկզբանե ստեղծվել է և շարունակում է զարգանալ ընդհանուր տարածքների ձևավորման տրամաբանությամբ՝ ներառելով ընդհանուր էներգետիկ շուկան, սակայն գործնականում այս սկզբունքի իրականացումը բախվում է տարբեր դժվարությունների, ինչի հետևանքով հայտարարված որոշ նախաձեռնություններ գործում են ոչ լիարժեք։
Եվրասիական միջկառավարական խորհրդի նիստի ժամանակ այս մասին հայտարարել է ՀՀ վարչապետ Նիկոլ Փաշինյանը։
«Հաշվի առնելով այս հատվածի բարդ կառուցվածքն՝ ընդհանուր էներգետիկ շուկայի արդյունավետությունն ու ժամանակին ձևավորումը կախված է կողմերի՝ փոխզիջումային լուծում գտնելու պատրաստակամությունից։ Վստահ եմ, որ համակարգված մոտեցումը, շահերի համաձայնեցումը և փոխզիջումների գնալու պատրաստակամությունը կօգնի ամրապնդել էներգետիկ անվտանգությունն, ինչպես նաև արագացնել ընդհանուր էներգետիկ շուկայի ստեղծման գործընթացը»,-նշեց վարչապետը։
Նա հայտարարեց, որ Հայաստանի Հանրապետությունը պատրաստակամ է փոխշահավետ համագործակցությանն՝ ուղղված ԵԱՏՄ-ի գործառույթների արդյունավետության բարձրացմանն ու գործնական արդյունքներին։
