Հանրային ծառայությունները կարգավորող հանձնաժողովը բավարարել է «ՍՏԱՐԼԻՆԿ ԷՅԷՄ» ընկերության հայտերը․ ՀՀ բարձր տեխնոլոգիական արդյունաբերության նախարար Մխիթար Հայրապետյանը լիահույս է, որ մոտակա ամիսներին կավարտվի նաև թեստավորման փուլը, և ծառայությունն ամբողջությամբ կշահագործվի։
Մխիթար Հայրապետյանն այդ մասին գրել է «Ֆեյսբուք»-ի իր էջում։
«Դեկտեմբերի 4-ի և դեկտեմբերի 13-ի՝ ՀԾԿՀ-ում կայացած նիստերի որոշումներով՝ բավարարվել են ՀՀ տարածքում «ՍՏԱՐԼԻՆԿ ԷՅԷՄ» ՍՊ ընկերության հայտերը՝
1. Հանրային էլեկտրոնային հաղորդակցության ցանցի շահագործման լիցենզիայի թույլտվություն տրամադրելու վերաբերյալ:
2. Արբանյակային կապի գլոբալ համակարգերով շահագործվող հանրային էլեկտրոնային հաղորդակցության ցանցի կազմակերպման համար երկրորդական հիմունքներով ռադիոհաճախականությունների տիրույթների օգտագործման թույլտվություն տրամադրելու վերաբերյալ:
Այսպիսով` լիցենզավորումը և թույլտվությունները տրամադրված են, և այժմ թևակոխում ենք թեստավորման փուլ, որը, լիահույս եմ՝ մոտակա ամիսներին կավարտվի, և ծառայությունն ամբողջությամբ կշահագործվի»,- գրել է Հայրապետյանը։
