Մեկնարկել է ԱԺ ութերորդ գումարման ութերորդ նստաշրջանի հերթական նիստը, որի ժամանակ քննարկվում է Հայաստանի ու Ադրբեջանի միջև պետական սահմանի սահմանազատման և սահմանային անվտանգության հարցերով հանձնաժողովի ու Ադրբեջանի և Հայաստանի միջև պետական սահմանի սահմանազատման պետական հանձնաժողովի համատեղ գործունեության մասին կանոնակարգը վավերացնելու մասին օրենքի նախագիծը:
«Հայաստան» խմբակցության անունից ելույթով հանդես է եկել Արմեն Ռուստամյանը և անդրադառնալով գործընթացին, նշել, թե կանոնակարգն ամբողջությամբ հակասահմանադրական է, ուստի խմբակցությունը ո՛չ քվեարկությանը, ոչ էլ քննարկմանը չի մասնակցելու:
«Պատիվ ունեմ» խմբակցության ղեկավար Հայկ Մամիջանյանն էլ հայտարարեց՝ «Պատիվ ունեմ» խմբակցությունը չի մասնակցել և չի մասնակցելու կանոնակարգի քննարկմանն ու քվեարկությանը, քանի որ հիմնավոր կասկած ունեն, որ «սույն գործողությունները միտված են հերթական հակապետական զիջումներին արդարացում ծառայելուն հետագայում»:
Հիշեցնենք, որ Արտաքին հարաբերությունների հանձնաժողովը հոկտեմբերի 21-ին դրական եզրակացություն տվեց նախագծին։
Խորհրդարանի կողմից կանոնակարգի վավերացման համար առնվազն 54 կողմ ձայն է անհրաժեշտ:
Հոկտեմբերի 8-ին Կառավարությունը խորհրդարանի վավերացմանն է ուղարկել Հայաստանի և Ադրբեջանի միջև սահմանազատման հանձնաժողովների համատեղ գործունեության կանոնակարգի նախագիծը:
