Քննչական կոմիտեի խոսնակ Գոռ Աբրահամյանը հայտնում է, որ նշանակվել են փորձաքննություններ՝ Երևանին փոխանցված անձանց ինքնությունը պարզելու ուղղությամբ:
Այսօր ավելի վաղ Ազգային անվտանգության ծառայությունը հայտնել է, որ ադրբեջանական կողմը հայկական կողմին է փոխանցել ենթադրաբար 2022 թվականի սեպտեմբերյան երկօրյա մարտական գործողությունների ժամանակ զոհված 2 հայ զինծառայողների դիակ-մասունքներ:
«2022թ․ սեպտեմբերի 13-14-ին ՀՀ-ի դեմ սանձաազերծված ագրեսիվ պատերազմի առթիվ ՀՀ ՔԿ զինվորական քննչական գլխավոր վարչությունում նախաձեռնված քրեական վարույթի շրջանակներում իրականացվում են անհրաժեշտ քննչական և վարութային գործողություններ, այդ թվում՝ նշանակվել են դիակի դատաբժշկական և դատագենետիկական փորձաքննություններ՝ անձանց ինքնությունը պարզելու ուղղությամբ», — գրել է Աբրահամյանն իր ֆեյսբուքյան էջում։
ՔԿ խոսնակը հիշեցնում է, որ 2022-ի սեպտեմբերին Հայաստանի դեմ իրականացված ագրեսիայի հետևանքով մինչ օրս անհայտ է 2 զինծառայողի գտնվելու վայրը։
