ՀՀ Սյունիքի մարզպետ Ռոբերտ Ղուկասյանը չի կարծում, որ մարզում սահմանազատում և սահմանագծում անելուց հետո կարող են Ադրբեջանին տարածքներ անցնել։ Այս մասին նա ասաց ՀՀ ԱԺ–ում ճեպազրույցի ժամանակ՝ պատասխանելով հարցին` արդյոք Սյունիքից տարածքներ հանձնվելու են այդ գործընթացի շրջանակում։
«Չեմ կարծում։ Ես կարծում եմ, որ շատ տեղերում ավելի շատ պետք է ադրբեջանցիները հետ քաշվեն։ Եթե սահմանագծում, սահմանազատում արվի, իհարկե, ադրբեջանցիները պետք է հետ քաշվեն օկուպացված տարածքներից, քանի որ Սյունիքում ՀՀ սուվերեն տարածքում ներխուժում կա։ Հստակ սահմանագծում և սահմանազատում կա քարտեզով, որը վարչապետը ներկայացրել է»,- ասաց Ղուկասյանը։
Նա անդրադարձավ նաև այն հարցին, թե մարդիկինչ են խոսում մարզում սահմանագծման և սահմանազատման մասին, մասնավորապես ելնելով այն բանից, որ Տավուշի մարզում արդեն սկսվել է այդ գործընթացը։
«Սյունիքում ինձ հետ շփումներում հասարակությունն առանձնապես շատ չի խոսում այդ թեմաներով, բայց սահմանազատումն ու սահմանագծումը կարևոր գործընթաց է և կարծում եմ` պետք է լինի»,– նշեց Ղուկասյանը։
Մարզպետը միաժամանակ շեշտեց՝ սահմանազատման և սահմանագծման գործընթացի մասին հստակ ինֆորմացիա չունի, քանի որ համապատասխան հանձնաժողովում ընդգրկված չէ։
«Երբ այդ օրակարգը գա Սյունիք, ես տեղյակ կլինեմ»,- ասաց Ղուկասյանը։
