Տավուշի մարզում, ըստ օբյեկտիվ և հանրային տվյալների, տեղի է ունեցել խաղաղ հավաքին մասնակցող անձանց նկատմամբ խուլիգանություն՝ բռնություն գործադրելով: Բռնությունը դրսևորվել է վրաերթի ենթարկելու և ֆիզիկական բռնության իրացմամբ, այս մասին հայտնել է փաստաբան Արամ Վարդևանյանը։
«Ոստիկանության որոշ պաշտոնյաներ հայտնեցին, որ դրա վերաբերյալ հաղորդում չեն ստացել և, ըստ էության, առերևույթ նույն անձը (անձինք) երկու անգամ համանման ապօրինի վարքագիծ է դրսևորել, իսկ իրավապահները չեն կանխել: Վերջին ամիսների ընթացքում առանց որևէ նշված հաղորդման պարզապես ԶԼՄ հրապարակման հիման վրա բազմաթիվ անձինք են ձերբակալվել, քրեական վարույթներ են նախաձեռնվել Քննչական կոմիտեի կողմից: Ավելին՝ քրեական դատավարության օրենսգիրքը նշվածը փաստացի որպես պարտականություն է նախատեսում քննիչի համար»,- Facebook-ում գրել է Վարդևանյանը։
Նա հիշել է Բագրատ Սրբազանի խոսքերը։ Վերջերս մեջբերել էր իրավաբանների համար ամենակարևոր ելակետերից մեկը՝ Տիրոջ պատգամներից մեկը՝ «Եվ կճանաչեք ճշմարտությունը, և ճշմարտությունը Ձեզ կազատի… »:
