Ադրբեջանի ախորժակը մենք հիմա էլ կարող ենք փակել. Եթե Ադրբեջանը մենակ պատերազմ սկսի մեր դեմ, ատամները կջարդենք, բայց իր հետեւում կանգնած են Թուրքիան, Ռուսաստանը: Այս մասին NEWS.am-ի հետ զրույցում նշեց ԱԺ «Քաղաքացիական պայմանագիր» խմբակցության պատգամավոր Գագիկ Մելքոնյանը:
«Ռուսաստանը Ադրբեջանի փաստաբանն է դարձել վերջին տարիներին:
Հիմա Ռուսաստանը հայտարարում է, որ Բրյուսելում Փաշինյան-Բլինքեն-ֆոն դեր Լայեն հանդիպումը հայ ժողովրդին վնաս է: Դուք որտեղի՞ց իմացաք մեր վնասն ու օգուտը: Ղարաբաղը դատարկեցիք, հիմա Զանգեզուրի միջանցք եք ուզում խլել մեզնից: Դա մեր պետության համար օգո՞ւտ է, թե՞ վնաս: Երբ գեղեցիկ ձեւով ադրբեջանցիների հետ միասին հայերին հանեցիք ԼՂ-ից, դա հայերի համար օգո՞ւտ էր, թե՞ վնաս:
Երբ պարտքի դիմաց մեր գործարանները խլեցիք մեզնից, դա օգո՞ւտ էր մեզ, թե՞ վնաս:
Հիմա, որ ԵՄ-ն ցանկանում է մեզ ֆինանսական աջակցություն տալ, դա իրենց կարծիքով մեզ համար օգո՞ւտ է, թե՞ վնաս:
Ռուսաստանն ասում է՝ Ադրբեջանին հարցրե՞լ են, որ ԵՄ դիտորդներ են տեղակայել սահմանի վրա: Ձեր ի՞նչ գործն է, ինչի՞ եք խառնվում մեր գործերին: Դա գալիս է նրանից, որ դարերով իրենք են այստեղ ղեկավարել մեր երկիրը: 2018-ից 2020-ը էլի կարողանում էին այստեղ եղանակ ստեղծել, բայց տեսան եղանակը չի ստացվում, պատերազմ կազմակերպեցին մեր երկրի դեմ»,- հայտարարեց ՔՊ-ական պատգամավորը:
Նա վստահեցրեց, որ Հայաստանի ղեկավարները ճիշտ ուղու վրա են և վերջապես գնում են մեր պետական շահի հետեւից:
