Հայաստանի Հանրապետության գլխավոր դատախազ Աննա Վարդապետյանի գլխավորությամբ այսօր մեկնարկել է «Հայաստանն ու Եվրաջասթը. ինչպե՞ս փոխգործակցել Եվրաջասթի հետ համագործակցության հարցերով Հայաստանի Հանրապետությունից գործուղված դատախազի հետ» թեմայով կլոր սեղան-քննարկումը:
Քննարկումն իրականացվում է Նիդերլանդների Թագավորությունում գործող՝ Միջազգային իրավական համագործակցության կենտրոնի հետ համագործակցությամբ:
Կլոր սեղան-քննարկման նպատակն է բարձրացնել Եվրաջասթի (Եվրոպական միության քրեական արդարադատության ոլորտում համագործակցության գործակալության), ինչպես նաև Եվրաջասթի համագործակցության հարցերով դատախազների հիմնական գործառույթների վերաբերյալ մասնակիցների իրազեկվածությունը՝ անդրազգային հանցագործություններով նախաձեռնված քրեական վարույթների նախաքննության և քրեական հետապնդման համատեքստում, ինչպես նաև ներկայացնել և քննարկել Եվրաջասթի գործիքներին հասանելիություն ստանալու նպատակով աջակցության հայտ ներկայացնելու պայմանները և այլն:
Գլխավոր դատախազ Աննա Վարդապետյանը ողջունել և շնորհակալություն է հայտնել բոլորին՝ Հայաստանի Հանրապետության դատախազության համար կարևոր միջոցառմանը մասնակցելու հրավերն ընդունելու, կլոր սեղան-քննարկմանը մասնակցելու համար և նշել.
«Հայաստանի Հանրապետության դատախազությունը ձգտում է ապահովել սերտ համագործակցություն միջազգային և տարածաշրջանային մասնագիտական կառույցների հետ, մոտեցնել դատախազի մասնագիտական կարողությունները, հնարավորություններն ու կերպարը միջազգային չափորոշիչներին:
«Հայաստանի Հանրապետության և Եվրոպական միության միջև Հայաստանի Հանրապետության քրեական վարույթներով իրավական համագործակցության ոլորտում իրավասու մարմինների և Եվրաջասթի միջև համագործակցության մասին» համաձայնագիրը ստորագրվել է Բրյուսելում 2024 թվականի ապրիլի 5-ին: Հաջորդիվ՝ ստորագրվեց «Հայաստանի Հանրապետության դատախազության և Արդարադատության նախարարության և Եվրաջասթի միջև համագործակցության մասին համաձայնագրի իրականացման վերաբերյալ» աշխատանքային պայմանավորվածությունը։
Մենք արդեն իրականացրել ենք անհրաժեշտ բոլոր ներքին իրավական ընթացակարգերը և նախատեսում ենք 2026 թվականի ընթացքում դատախազ գործուղել Եվրաջասթ:
Առիթն օգտագործելով ցանկանում եմ ընդգծել Նիդերլանդերում գործող Միջազգային իրավական համագործակցության կենտրոնի հետ մեր՝ բոլորովին վերջերս ձևավորված, սակայն հետևողական և արդյունավետ համագործակցությունը: Շնորհակալություն եմ հայտնում նաև Հայաստանի Հանրապետությունում Նիդերլանդների Թագավորության դեսպանությանն այս նախաձեռնությանը ցուցաբերած աջակցության համար:
Հատուկ շնորհակալություն եմ հայտնում Եվրաջասթի մեր գործընկերներին՝ հրավերն ընդունելու և Հայաստան այցելելու համար: Սա Հայաստանում իրականացվող՝ նախադեպը չունեցող միջոցառում է, և վստահ եմ, որ այն էլ ավելի կնպաստի Եվրաջասթի հետ ինստիտուցիոնալ հարաբերությունների ամրապնդմանն ու առավել ակտիվ փոխգործակցությանը:
Այս միջոցառման իրականացմամբ մենք ցանկանում էինք նախքան Հաագա դատախազ գործուղելը՝ ներպետական մարմինների ներկայացուցիչներին ծանոթացնել Եվրաջասթի հետ համագործակցության հարցերով գործուղված դատախազների հիմնական գործառույթներին՝ անդրազգային կազմակերպված հանցավորության դեմ պայքարի համատեքստում»:
Հայաստանի Հանրապետությունում Նիդերլանդների Թագավորության փոխդեսպան Թիմեն Կաուվենարը կարևորել է նման բովանդակությամբ քննարկում կազմակերպելն ու ընդգծել, որ Հայաստանը Նիդերլանդների կարևոր գործընկերն է, և մեր երկկողմ հարաբերությունները բարձրացել են դեպի ռազմավարական համագործակցության:
Եվրաջասթի Գործընկերների հետ հարաբերությունների հարցերով խորհրդի նախագահ Բոստյան Շկրլեցը շնորհակալություն է հայտնել աշխատանքային քննարկմանը մասնակցելու հրավերի համար և ընդգծել, որ Եվրաջասթի «ճանապարհորդությունը» Հայաստանի հետ շատ արդյունավետ է և բովանդակային:
Կլոր սեղան-քննարկմանը մասնակցել են նաև Միջազգային իրավական համագործակցության կենտրոնի Ծրագրի ղեկավար Դոմենիկո Ֆոտին, Եվրաջասթի ԵՄ-ի և միջազգային հարաբերությունների հարցերով բաժնի իրավախորհրդատու Ֆլորինա Բիսոգը, Եվրաջասթի հետ համագործակցության հարցերով Ուկրաինայից գործուղված դատախազ Միրոսլավա Կրասնոբորովան, Եվրաջասթի հետ համագործակցության հարցերով Նորվեգիայից գործուղված դատախազ Ռուդոլֆ Քրիստոֆֆերսենը, Արդարադատության, Ներքին գործերի և Արտաքին գործերի նախարարությունների և իրավապահ մարմինների ներկայացուցիչները, մասնավորապես՝ Դատախազության միջազգային-իրավական համագործակցության վարչության դատախազները և այն դատախազները, ովքեր հսկողական և վերահսկողական գործառույթներ են իրականացնում խարդախության, կիբեռհանցագործության, թմրանյութերի ապօրինի շրջանառության, փողերի լվացման հանցագործություններով, ինչպես նաև ապօրինի ծագում ունեցող գույքի բռնագանձման գործերով ներգրավված դատախազները:
Միջոցառման ընթացքում Եվրաջասթի հետ համագործակցության հարցերով Նորվեգիայից և Ուկրաինայից գործուղված դատախազների, Լատվիայի ազգային անդամի, ինչպես նաև Եվրաջասթի ներկայացուցիչների կողմից կներկայացվեն համագործակցության հարցերով դատախազների հետ աշխատանքի առանձնահատկություններն ու հնարավորությունները: Կներկայացվեն նաև Եվրաջասթի գործիքակազմից օգտվելու, ինչպես նաև վարույթների առնչությամբ օպերատիվ տեղեկատվության համակարգված փոխանակման նպատակով Եվրաջասթին դիմելու կարգն ու պայմանները:
