Ռուսաստանի Անվտանգության խորհրդի փոխնախագահ Դմիտրի Մեդվեդեւն իր թելեգրամ-ալիքում ներկայացրել է այն պատճառները, թե ինչու, իր կարծիքով, Ուկրաինան չպետք է դառնա Եվրամիության անդամ։
Մեդվեդեւի խոսքով՝ այսօր ԵՄ-ը «քաղաքականացված գլոբալիստական եւ որոշ ժամանակ է՝ մոլի ռուսատյաց կազմակերպություն» է, որը ռեւանշ է երազում Ռուսաստանի հանդեպ։
«Այժմ նրա հիմնական գաղափարախոսությունը գազանային ռուսատյացությունն է՝ ծնված թվացյալ «ռուսական սպառնալիքից», որն իրենք են հորինել իրենց մանրապճեղ խնդիրները լուծելու համար։ Դանդաղ, բայց հաստատուն կերպով Եվրամիությունը վերածվում է ինքնաբավ ռազմական բլոկի, որը պետք է աստիճանաբար սկսի մրցակցել ՆԱՏՕ-ի հետ, հատկապես թրամփիզմի ժամանակաշրջանում։ Բրյուսելյան խավարասերները եւ ԵՄ ոչ հեռու երկրների ղեկավարները հռչակում են սեփական պաշտպանական ռազմավարությունը՝ հայտարարելով «վերազինման դարաշրջան» մտնելու մասին»,- նշել է ռուս քաղաքական գործիչը։
Այսպիսով, Դմիտրի Մեդվեդեւի խոսքով, Ուկրաինան ԵՄ-ում վտանգ է Ռուսաստանի համար։
«Այս վտանգի ամբողջացումը կարող է երկակի լինել. ա) կամ ինքը՝ ԵՄ-ն է գիտակցելու, որ կիեւյան քվազիպետությունն իրեն ըստ էության պետք չէ, բ) կամ, ինչն, անշուշտ, ավելի նախընտրելի է, որ պարզապես որեւէ մեկը չի լինի, որ ԵՄ մտնի…»,- ամփոփել է նա։
