Նյու Յորքում ԱՄՆ պետքարտուղար Էնթոնի Բլինքենի այսօրվա հանդիպումը Հայաստանի արտգործնախարար Արարատ Միրզոյանի և Ադրբեջանի արտգործնախարար Ջեյհուն Բայրամովի հետ տեղի կունենա 10։15-ին (Երևանի ժամանակով ժամը 18։15-ին), հաղորդում է ԱՄՆ պետդեպարտամենտը։
Երեկ Հայաստանի արտգործնախարարությունը հաղորդեց, որ սեպտեմբերի 26-ին Նյու Յորքում կկայանա Միրզոյան-Բլինքեն-Բայրամովի եռակողմ հանդիպումը: Բաքուն ևս հաստատեց տեղեկությունը։
Անցած շաբաթ Վաշինգտոնը հայ-ադրբեջանական բանակցություն կազմակերպելու պատրաստակամություն էր հայտնել։
ԱՄՆ պետդեպարտամենտի խոսնակ Մեթյու Միլլերն ասել էր, որ Վաշինգտոնը միշտ էլ առիթներ է փնտրում Հայաստանի և Ադրբեջանի արտգործնախարարների հանդիպման համար՝ նշելով, որ Բլինքենը հույս ունի ևս մեկ հանդիպում կազմակերպել Նյու Յորքում։
Նյու Յորքում ընթանում է ՄԱԿ-ի Գլխավոր ասամբլեայի 79-րդ նստաշրջանը։ Միրզոյանն ու Բայրամովը Նյու Յորքում են։
Վերջին անգամ արտգործնախարարները բանակցել են ամերիկյան հարթակում՝ հուլիսի սկզբին։ Այդ հանդիպմանն ընդառաջ ԱՄՆ pետքարտուղարը ելույթ էր ունեցել, շեշտելով, որ Հայաստանն ու Ադրբեջանը շատ մոտ են հասնելու վերջնական համաձայնության։
Երևանն ու Բաքուն հայտարարել են, որ խաղաղության պայմանագրի մոտ 80 տոկոսի շուրջ ընդհանուր հայտարարի են եկել։
Երևանն առաջարկում է ստորագրել համաձայնեցված դրույթները, ունենալ հիմնարար փաստաթուղթ, որից հետո շարունակել քննարկումներ մնացած հարցերի վերաբերյալ։
Օրերս Երևանում կայացած «Երևանյան երկխոսություն» համաժողովի ժամանակ վարչապետ Նիկոլ Փաշինյանը վերահաստատեց խաղաղության պայմանագրի այս պահին համաձայնեցված տեքստը ստորագրելու, չհամաձայնեցված հարցերը ապագային թողնելու պատրաստակամությունը։ Փաշինյանի այս առաջարկը Բաքուն մերժել է։
Ադրբեջանը պահանջում է Հայաստանից փոխել Սահմանադրությունը՝ զգուշացնելով՝ հակառակ պարագայում խաղաղության պայմանագիրը չի ստորագրի։ Բաքուն խնդրահարույց է համարում Հայաստանի մայր օրենքում հիշատակված Անկախության հռչակագիրը, որում հղում կա Հայաստանի ու Լեռնային Ղարաբաղի միավորմանը։ Երևանն էլ Սահմանադրությունը փոխելու Բաքվի պահանջը Հայաստանի ներքին գործերին միջամտելու փորձ է որակում։
