Թուրքիան իսկապես Հարավային Կովկասի հարևանն է, սակայն ինքնին Հարավային Կովկասի մաս չի կազմում, ինչպես նաև Եվրամիությունը։ Բայց ինչպե՞ս կարող են Թուրքիան և Եվրամիությունը դրական դեր խաղալ Հարավային Կովկասում։ Առաջին հերթին անհրաժեշտ է ապահովել կապը Հարավային Կովկասի հետ։ Այս մասին մայիսի 5-ին «Երևանյան երկխոսություն-2026» միջազգային համաժողովի ընթացքում հայտարարել է Հայաստանի խորհրդարանի փոխնախագահ, Թուրքիայի հետ հարաբերությունների կարգավորման հարցերով հատուկ ներկայացուցիչ Ռուբեն Ռուբինյանը։
«Իհարկե, կան երկաթուղիներ, ավտոճանապարհներ և ենթակառուցվածքներ, որոնք Թուրքիան կապում են Վրաստանի և Ադրբեջանի հետ, սակայն բացակայում է կենսականորեն կարևոր օղակը։ Հայաստանը Եվրամիության հետ ուղիղ երկաթուղային կապ չունի, որովհետև, ցավոք, մինչ այժմ մենք հնարավորություն չենք ունեցել երկաթուղային հաղորդակցություն հաստատել Հայաստանի և Թուրքիայի միջև, հետևաբար նաև՝ Եվրամիության հետ։ Եթե դա տեղի ունենար, հսկայական հնարավորություններ կստեղծեր Հայաստանի, Թուրքիայի, Ադրբեջանի, Վրաստանի և Եվրամիության համար»,- նշել է Ռուբինյանը։
Նա հավելել է, որ Ադրբեջանի կողմից Հայաստան տարանցման սահմանափակումների վերացումը անհնար կլիներ առանց Վրաստանի մասնակցության, որովհետև Ղազախստանից և Ռուսաստանից Հայաստան մտնող ապրանքներն անցնում էին Ադրբեջանի, ապա նաև Վրաստանի տարածքով։
«Եվ մենք շատ շնորհակալ ենք մեր վրացի ընկերներին դրա համար։ Իհարկե, արտաքին խաղացողները կարող են օգտակար լինել, կարող են նաև ոչ այնքան օգտակար լինել, և աշխարհը լի է թե՛ մեկի, թե՛ մյուսի օրինակներով։
Ցավոք, վերջին շրջանում երկրորդ օրինակն ավելի հաճախ է հանդիպում, սակայն կարծում եմ, որ հենց այն փաստը, որ Երևանում հավաքվել են հայ, վրացի, ադրբեջանցի, թուրք և Եվրամիության ներկայացուցիչ, նշանակում է, որ մենք ճիշտ ճանապարհի վրա ենք։ Ես բացարձակապես համոզված եմ, որ թե՛ Եվրամիությունը, թե՛ Թուրքիան առաջիկա տարիներին, ամիսներին, շաբաթներին կամ գուցե օրերին շատ դրական դեր կխաղան Հարավային Կովկասում»,- եզրափակել է Ռուբինյանը։
Թուրքիայի հատուկ ներկայացուցիչը Երևանում հանդես է եկել ոչ տարածաշրջանային ուժերի միջամտության դեմ
