«Քաղաքացիական պայմանագիր» խմբակցության քարտուղար Արթուր Հովհաննիսյանը Ազգային ժողովում իր ելույթի ժամանակ անդրադարձավ վերջին շրջանում խորհրդարանական ընդդիմության առաջ բերած և բերվող տաբեր մեկնաբանություններին, որոնք կապված են Տավուշում սահմանազատման գործընթացի հետ:
Պատգամավորը մասնավորապես արձագանքեց «Հայաստան» խմբակցության ղեկավար Սեյրան Օհանյանի հայտարարություններին, որում նա իշխանություններին մեղադրել է «հողեր հանձնելու և դավաճանությունների համար»:
Հովհաննիսյանի խոսքով՝ ընդդիմությունը շարունակում է կրկնել այն նույն թեզերը, ինչ 2018 թվականի հեղափոխությունից հետո. մեղադրում են Լեռնային Ղարաբաղը, այժմ Տավուշի սահմանամերձ՝ ադրբեջանական չորս գյուղերը հանձնելու համար:
Ըստ նրա՝ պատմությունը ցույց է տալիս՝ ո՞վ, ինչպե՞ս և ե՞րբ է հանձնել Լեռնային Ղարաբաղը և ամեն բան արել 44-օրյա պատերազմում հայկական կողմի ձախողման համար:
Վերջինս հիշեցրեց՝ ընդդիմությունն ի սկզբանե դեմ է եղել միջազգային հովանու ներքո ԼՂ-ի և Ադրբեջանի ներկայացուցիչների երկխոսությանը, որտեղ հնարավոր կլիներ հասցեագրել ԼՂ ժողովրդի իրավունքների իրացման և անվտանգության հարցերը: Հովհաննիսյանը նկատեց՝ ընդդիմությունը նախապատրաստում էր «պալատական հեղաշրջում», որը չհաջողվեց:
«Դեմ էր, սակայն միևնույն ժամանակ չէր առաջարկում ոչինչ։ Մեկ էլ հանկարծ հնչեց զանգ: Ե՛վ զանգի, և՛ ընդդիմության համատեղ ջանքերի պատճառով ԼՂ ներկայացուցիչները չգնացին միջազգային հովանու ներքո կազմակերպված հանդիպմանը: Չգնացին: Վախեցան: Ու այս խմբակը, որ այսօր կոչվում է ընդդիմություն, այդ գործի մեջ էր ամբողջությամբ: Իսկ ինչո՞ւ ընդդիմությունը նման բան արեց. որ այդ երկխոսությունը տեղի չունենա, որովհետև այդպես ձեռք չէր տալիս նրանց տերերին: Որովհետև, եթե տեղի ունենար այդ երկխոսությունը, նրանց տերերը որտե՞ղ պետք է տեղակայվեին, ո՞ւմ պետք է փրկեին: Պարզ է, չէ՞: Դրանից հետո արեցին «պալատական հեղաշրջում»: Արցախի խորհրդարանի դաշնակ պատգամավորներով ինչ-որ մեկին նշանակեցին նախագահ՝ վերջնականապես փակելով երկխոսությունը ԼՂ ժողովրդի համար, իսկ երկխոսության կողմնակիցներին անվանեցին դավաճաններ: Դաշնակների նշանակած նախագահը մի քանի օր անց, երբ լուծարեց ԼՂ-ն, և այլևս ոչինչ հնարավոր չէր խոսել հայ ժողովրդի իրավունքների մասին, երբ ԼՂ ժողովուրդը բռնի տեղահանվում էր Լաչինի միջանցքով, հենց այդ պահին ուղղաթիռով՝ ԼՂ ժողովրդի գլխի վրայով թռչելով՝ դեսանտ իջավ Հայաստան: Պարզ է, չէ՞, ով էր դա կազմակերպել, իսկ հիմա գլխներից մեծ հայտեր են ներկայացնում, փողեր են ուզում»,- նշեց Հովհաննիսյանը՝ հավելելով՝ Սոֆիայում կազմակերպված հանդիպումը հիմա դիտարկում է որպես պատմական շանս, քանի որ ԼՂ հայությունը միգուցե կարողանար ապրել իր հողում:
Դիմելով ընդդիմությանը՝ պատգամավորն ասաց. «Բայց ձեր՝ հայկական պետականությանն ու հայ ժողովրդին վնասելու մոտիվացիան այնքան մեծ էր, որ չհաշվարկված քայլերի պատճառով լուծարեցիք ԼՂ-ն, ինչի պատճառով ռուս խաղաղապահները լքեցին Լեռնային Ղարաբաղը: Հետո մեզ մեղադրում եք մեր դաշնակիցներին վնասելու համար: Դուք այնպես արեցիք, որ ռուս խաղաղապահները դուրս գան ԼՂ-ից, հիմա էլ պարտքերը տալու համար ընկել եք Տավուշի հետևից: Տեղակայման վա՞յր եք ման գալիս: Սա է ձեր պատվերն այս պահին: Դուք դրան եք լծված հիմա: Շատ կարևոր է, որ մեր հայրենակիցները ֆիքսեն այս ամենը և չտրվեն այս դավաճանների լոզունգներին, կենացներին և պատմական Հայաստանի մասին մոլորություններին։ Ես վստահ եմ՝ դուք ձեր արժանի պատիժը կստանաք, եթե ոչ օրենքի ողջ խստությամբ, ինչ-որ մի օր, ինչ-որ մի տեղ Աստված ձեզ կպատժի, և այդ ժամանակ ոչ մի սրբազան ձեզ չի փրկելու»։
Նրա խոսքով՝ տեղի ունեցածի մասին առաջին հերթին պետք է իմանան ԼՂ-ից բռնի տեղահանված հայրենակիցները, թե ինչպես են նրանք (- խմբ․ ընդդիմադիրները) զրկել իրենց տներում ապրելու վերջին հնարավորությունից՝ հանուն իրենց տերերի:
