Իսրայելի ղեկավարությունը հարվածներ չի հասցի Իրանի միջուկային ենթակառուցվածքի օբյեկտներին՝ չունենալով ԱՄՆ նախագահ Դոնալդ Թրամփի անմիջական հավանությունն ու աջակցությունը։ «Արմենպրես»-ի փոխանցմամբ՝ այդ մասին գրում է բրիտանական Financial Times (FT) թերթը՝ վկայակոչելով իսրայելցի և արաբ դիվանագետների։
Նրանց կարծիքով՝ Իսրայելը ձեռնպահ կմնա ռազմական գործողություններից՝ առանց Սպիտակ տան հավանության՝ վախենալով Թրամփին «զայրացնելուց» և նրա օժանդակությունից զրկվելուց, ինչպես նաև՝ ելնելով այն հանգամանքից, որ առանց ԱՄՆ-ի սեփական հարվածներն Իրանին կունենան շատ սահմանափակ ազդեցություն։ Ըստ որում, Թրամփն ինքն այս պահին կենտրոնացած է իրանական միջուկային ծրագրի հարցերի կարգավորման դիվանագիտական ուղիների որոնումների վրա։
ԱՄՆ նախագահը, ինչպես նշում է հրատարակությունը, տեղի չի տալիս Իսրայելի վարչապետ Բենիամին Նեթանյահուի ճնշմանը, որը ձգտում է ավելի վճռական և ագրեսիվ գործողությունների հասնել Վաշինգտոնի կողմից։
