Թրամփի վարչակազմը որոշել է վերսկսել վերջերս չեղարկված ԱՄՆ արտաքին օգնության առնվազն վեց ծրագրերը՝ շտապ պարենային օգնություն տրամադրելու համար, հայտնում է Reuters-ը։
Ինչպես նել են խնդրին ծանոթ 6 աղբյուրներ, ընդամենը մի քանի օր առաջ ընդունված որոշումների արագ փոփոխությունը ընդգծել է Թրամփի կողմից օգնության կրճատումների իմպուլսիվ բնույթը: Դա հանգեցրել է նրան, որ ծրագրերը չեղարկվել են, այնուհետև վերսկսվել են, հետո նորից չեղարկվել՝ խափանումներ առաջացնելով միջազգային մարդասիրական առաքելությունների համար:
ԱՄՆ Միջազգային զարգացման գործակալության (USAID) փոխտնօրենի պաշտոնակատար Ջերեմի Լևինը, ով նախկինում ճանաչված էր որպես միլիարդատեր Իլոն Մասկի գլխավորած Կառավարության արդյունավետության գրասենյակի անդամ, խնդրել է անձնակազմին չեղարկել ծրագրերը դադարեցնելու որոշումը:
Գործակալության աղբյուրների փոխանցմամբ՝ նա կոչ է արել վերսկսել Պարենի համաշխարհային ծրագրին տրամադրվող դրամաշնորհները Լիբանանում, Սիրիայում, Սոմալիում, Հորդանանում, Իրաքում և Էկվադորում։
Վարչակազմը նաև թարմացրել է Խաղաղօվկիանոսյան տարածաշրջանում Միգրացիայի միջազգային կազմակերպության չորս ֆինանսավորման ծրագիր, ասել են աղբյուրներից երկուսը:
«Կներեք ֆինանսավորման բոլոր տատանումների համար: Կան բազմաթիվ շահագրգիռ կողմեր, և մենք պետք է ավելի լավ աշխատանք կատարենք այս մրցակցող շահերը հավասարակշռելու համար. դա իմ սխալն էր, և ես պատասխանատվություն եմ կրում», — գրել է Լևինը նամակում, որը տեսել է Reuters-ը:
