Ապրիլի 4-ին ուկրաինական Կրիվոյ Ռոգ արդյունաբերական քաղաքի բնակելի թաղամասի ռուսական հրթիռակոծության հետևանքով զոհվել է առնվազն 19 մարդ, որոնց թվում՝ 9 երեխա, հայտնում են ուկրաինական պաշտոնական աղբյուրները: Նախագահ Զելենսկիի հայրենի քաղաքի վրա հարձակումը դարձել է այս տարի խաղաղ բնակիչների վրա ամենամահաբեր հարձակումներից մեկը, հայտարարել է Դնեպրոպետրովսկի շրջանի նահանգապետ Սերգեյ Լիսակը։
Լիսակը նշել է, որ քաղաքում փրկարարական գործողությունը շարունակվում է: Ներքին գործերի նախարարի փոխանցմամբ՝ ավելի քան 50 մարդ վիրավորվել է, նրանց թիվը կարող է աճել:
Հարվածի հետևանքով վնասվել են մոտ երկու տասնյակ բարձրահարկ շենքեր, ավելի քան 30 ավտոմեքենա, դպրոցներ և ռեստորաններ:
«Յուրաքանչյուր հրթիռ, յուրաքանչյուր ԱԹՍ-ով հարձակում ապացուցում է, որ Ռուսաստանը ձգտում է միայն պատերազմի», — գրել է Զելենսկին Տելեգրամում:
Ռուսաստանի պաշտպանության նախարարությունը հայտարարել է, որ հարձակման թիրախը քաղաքում ռազմական պաշտոնյաների հանդիպումն էր, և հարվածն էլ բնութագրել որպես «բարձր ճշգրտության»:
