Ուկրաինայի նախագահ Վլադիմիր Զելենսկին պատժամիջոցներ է սահմանել Վրաստանի ղեկավարության դեմ՝ խորհրդարանական ընտրությունների արդյունքների ենթադրյալ կեղծման դեմ ընդդիմության ցույցերը ցրելու համար։
Համապատասխան հրամանագրի ստորագրման մասին նա հայտարարել է իր Telegram ալիքում դեկտեմբերի 5-ին։
Նրա կազմած ցուցակում են Վրաստանի վարչապետ Իրակլի Կոբախիձեն և երկրի ղեկավարության այլ ներկայացուցիչներ, այդ թվում՝ իշխող «Վրացական երազանք» կուսակցության առաջնորդ Բիձինա Իվանիշվիլին։
«Սրանք պատժամիջոցներ են Վրաստանի կառավարության այն հատվածի դեմ, որը հիմա Վրաստանը հանձնում է Պուտինին, այս տարածաշրջանում ոչ մեկին չի կարելի կորցնել՝ ո՛չ Վրաստանին, ո՛չ Մոլդովային, ո՛չ էլ Ուկրաինային, մենք պետք է միասին պաշտպանվենք Մոսկվայից»,- ասել է Զելենսկին:
Ուկրաինայի նախագահը նաև ԵՄ-ին, ԱՄՆ-ին և ողջ աշխարհին կոչ է արել «սկզբունքորեն գործել» այս հարցում։
Նախկինում նա «ամոթ» էր անվանել Արևմուտքի նկատմամբ «Վրացական երազանքի» քաղաքականության պատճառով ընդդիմության հանրահավաքների ցրումը։
Հիշեցնենք՝ ԱՄՆ պետքարտուղար Էնթոնի Բլինքենը ավելի վաղ քննադատել է վրացական իշխանությունների գործողությունները ցուցարարների նկատմամբ ուժ կիրառելու համար և Թբիլիսիին սպառնացել ավելի կոշտ պատժամիջոցներով։
