ԱՄՆ պետքարտուղար Էնթոնի Բլինքենն այսօր երկօրյա այցով կմեկնի Եգիպտոս՝ համանախագահելու ԱՄՆ-Եգիպտոս ռազմավարական երկխոսության բացումը։
Նշվում է, որ ռազմավարական երկխոսությունը նպատակ ունի ամրապնդել երկու երկրների միջև հարաբերությունները և խորացնել տնտեսական զարգացումը։
Պետքարտուղարը կհանդիպի նաև Եգիպտոսի բարձրաստիճան պաշտոնյաների հետ՝ «քննարկելու Գազայում հրադադարի հասնելու շարունակական ջանքերը, որոնք կապահովեն բոլոր պատանդների ազատ արձակումը, կթեթևացնեն պաղեստինյան ժողովրդի տառապանքը և կնպաստեն ավելի լայն տարածաշրջանային անվտանգության հաստատմանը»:
Իրավիճակը Մերձավոր Արևելքում կտրուկ սրվել է 2023 թվականի հոկտեմբերի 7-ին, երբ «Համաս»-ի զինյալները Գազայի հատվածից անսպասելիորեն հարձակվել են հրեական խաղաղ ավանների վրա: Այդ գրոհների հետևանքով սպանվել է մոտ 1200 իսրայելցի, ևս ավելի քան 250 իսրայելցի պատանդառվել է:
Ըստ պաղեստինյան անկլավի առողջապահության նախարարության՝ Գազայի հատվածում իսրայելան ռազմական գործողությունների հետևանքով զոհված պաղեստինցիների թիվը գերազանցել է 40 հազարը։
«Համաս»-ը ԱՄՆ-ի և ԵՄ-ի կողմից ահաբեկչական կազմակերպություն է ճանաչվել։ Իսրայելի կառավարությունը հայտարարել է, որ Գազայի հատվածն ամբողջությամբ մաքրելու է «Համաս»-ի ահաբեկիչներից: Մեծ թվով երկրներ անհամաչափ են համարում Իսրայելի պատասխան գործողությունները:
Նախագահ Ջո Բայդենը մայիսի 31-ին ներկայացրել է եռափուլ հրադադարի առաջարկ, սակայն այդ ժամանակից ի վեր հրադադարի և Գազայում պատանդների ազատ արձակման վերաբերյալ վերջնական համաձայնագրում բացերը մնացել են:
Էնթոնի Բլինքենն ասել է, որ Գազայի հատվածում հրադադարի հասնելու համաձայնագրի 90 տոկոսը համաձայնեցված է, սակայն, կան մի քանի կարևոր խնդիրներ, և հրադադարի համար անհրաժեշտ է, որ Իսրայելը և ծայրահեղական «Համաս» խմբավորումը «այո» ասեն մնացած հարցերի շուրջ։
